Emmanuel Macron, forseti Frakklands, fundaði með Theresa May, forsætisráðherra Bretlands, í gær. Að fundi þeirra loknum sagði hann að ef Bretar sjái eftir því að hafa samþykkt að yfirgefa ESB þá sé þeim velkomið að vera áfram í sambandinu. Á sameiginlegum fréttamannafundi leiðtoganna sagði Macron að dyrnar að ESB stæðu Bretum að sjálfsögðu opnar á meðan samningaviðræðunum um Brexit er ekki lokið. Hann sagði jafnframt að hann virði ákvörðun bresku þjóðarinnar um útgöngu úr ESB og vonist til að samningaviðræðurnar um útgönguna geti hafist sem fyrst.

May var stuðningsmaður áframhaldandi veru Bretlands í ESB en í kjölfar niðurstöður kosninganna um Brexit lofaði hún að virða vilja fólks og draga Bretland út úr Evrópusamstarfinu. May sagði í gær að tímaáætlunin varðandi Brexit-viðræðurnar muni standast þrátt fyrir að niðurstöður þingkosninganna í Bretlandi í síðustu viku hafi verið aðrar en hún vonaðist til. Það stefnir því í að viðræðurnar hefjist í næstu viku.

Á heimavelli berst May fyrir pólitísku lífi sínu og reynir nú að mynda ríkisstjórn í kjölfar þess að Íhaldsflokkurinn missti hreinan meirihluta sinn á þingi. Hún boðaði til kosningar í þeirri von að flokkurinn myndi auka meirihluta sinn á þingi og þannig styrkja stöðu sína fyrir Brexit-viðræðurnar.