Hin ágæta fataverslun Jör hefur nú opnað á Týsgötu 1, á sögufrægum stað sem eitt sinn hýsti tískuverslunina Karnabæ. Þetta er á horni Týsgötu og Skólavörðustígs.

Ég hef áður skrifað um nafngiftina Karnabæ og hversu snjöll hún var – þetta var íslenskun á heitinu Carnaby Street, en þar var háborg tísku ungs fólks á Bítlaárunum.

En nafnið mæltist ekki alls staðar vel fyrir. Þetta er úr Sögu Íslands, ellefta bindinu, sem er nýútkomið. Þar skrifar sagnfræðingurinn Pétur Hrafn Árnason afar greinargott yfirlit þar sem er meðal annars fjallað um efnahags- og atvinnusögu tuttugustu aldarinnar og fram að hruni.

Bókarkafli Péturs ætti eiginlega að vera skyldulesning fyrir alla sem láta sér hagstjórn varða – þetta er saga gríðarlegra sveiflna og óstöðugleika og mjög lærdómsrík, En um það ætla ég að fjalla seinna.

Hér má sjá auglýsingu frá Karnabæ, þar stendur: Allt fyrir unga fólkið í fatnaði er stefna okkar!  Undir birtist texti úr sósíalistablaðinu Þjóðviljanum frá 1966 þar sem er fjallað um verslunina á heldur neikvæðan hátt.

Í orðabók Menningarsjóðs fundum við að vísu engan Karnabæ en hins vegar tvö orð lík, annars vegar kárnalegur sem þýðir sama og teprulegur og hins vegar nafnorðið karnaður sem er skýrt er með: Kynmök, hór. Nú er spurningin: Hvað þýðir þá Karnabær?

Hér má svo sjá ívitnaða grein í Þjóðviljanum sjálfum, eins og hún birtist á þeim frábæra vef timarit.is.