Það er biluð staða þegar verðandi forseti Bandaríkjanna leggur meiri trúnað á orð Vladimirs Pútíns og Julians Assange en á samanlagðar leyni- og öryggisþjónustur ríkisins. Nú lýsir James Clapper, yfirmaður leyniþjónustustofnana Bandaríkjanna, því yfir að hann muni birta meiri gögn um tölvuárásir Rússa í bandarísku kosninganna og að vitneskjan um þær hafi náð í efstu lög rússneska stjórnkerfisins.

Trump mun sjálfsagt ekki gefa sig, slíkt grefur undan sjálfu lögmæti þess að hann hafi verið kjörinn forseti, en fyrir Repúblikana á þingi er eiginlega óhugsandi að hunsa allt öryggiskerfi ríkisins – og binda trúss sitt við Assange.

Það er svo enn nokkur ráðgáta hvers vegna Trump er svona handgenginn Rússum – á því hefur í raun ekki fengist almennileg skýring. Bandalögin sem eru að myndast kringum kjör hans eru óvænt og skrítin – en vart er hægt að verjast þeirri tilhugsun að með þessu sé WikiLeaks gjörónýtt sem upplýsingaveita.