Það er athyglisvert að rýna í fyrsta heila framboðslista Viðreisnar sem kominn er fram – í Kraganum. Áhugamenn um bókmenntir reka reyndar fyrst augun í Hannes Pétursson sem er í heiðurssæti – eitt helsta skáld á Íslandi.
En það sem vekur athygli eru frambjóðendurnir úr viðskipta- og atvinnulífinu. Hér áður fyrr þótti nánast óhugsandi að fólk þaðan styddi annan flokk en Sjálfstæðisflokkinn, ekki nema það væri runnið undan Sambandinu eða dótturfyrirtækjum þess.
Viðreisn hefur komið sér upp fjarskalega sterkri „atvinnulífstengingu“, eins og það var eitt sinn kallað. Sjónarmiðin þaðan hafa ekki verið sérlega sterk á þingi hin síðari ár – ef undanskildir eru ötulir talsmenn útgerðar og landbúnaðarkerfisins sem ávallt er að finna á þingi.
Þorgerður Katrín Gunnarsdóttir, sem skipar efsta sæti listans, hefur undanfarin ár starfað hjá Samtökum atvinnulífsins. Jón Steindór Valdimarsson er fyrrverandi framkvæmdastjóri Samtaka iðnaðarins, en á listanum í Kraganum er líka að finna Kristínu Pétursdóttur sem á sínum tíma stofnað Auði Capital en er nú forstjóri Mentor.
Það er máski spurning hvort ofantaldir frambjóðendur höfða eitthvað til vinstri – en andspænis frambjóðendum Sjálfstæðisflokksins í kjördæminu virka þeir sterkir. En fyrst talað er um vinstri vænginn má nefna að Herdís Hallmarsdóttir lögmaður, eiginkona Magnúsar Orra Schram, fyrrverandi formannsframbjóðanda í Samfylkingunni, er í 23. sæti á listanum hjá Viðreisn í Kraganum.
