Viðskiptablaðið spyr í skoðanakönnun hvor Píratanna nýtur meira fylgis til að verða forsætisráðherra, Birgitta Jónsdóttir eða Helgi Hrafn Gunnarsson. Niðurstaðan er sú að Helgi nýtur talsvert meir hylli. 29 prósent eru jákvæð gagnvart honum sem forsætisráðherra, en 18 prósent Birgittu.

Á umræðusvæði Pírata má sjá að menn eru undrandi yfir þessu, þar túka margir skoðanakönnunina sem tilraun til að magna upp klofning, en í raun er ekkert óeðlilegt að spurt sé. Eins og staðan er virðist líklegt að Píratar verði í næstu ríkisstjórn – leiði hana jafnvel. Það hafa verið ýmis teikn á lofti um að Helgi Hrafn njóti meira trausts en Birgitta – hann er einfaldlega óvenju vinsæll stjórnmálamaður.

Birgitta Jónsdóttir segir að þarna sé „gamla Ísland að reyna að láta Pírata passa í eitthvað box sem hverfist um völd“.

Á það er bent á móti að erfitt sé að komast undan þeirri hefð á Íslandi að forsætisráðherra leiði ríkisstjórn. Birgitta svarar þá:

Fyrst þarf væntanlega að skilgreina hvað það er nákvæmlega sem forsætisráðherra á að gera í næstu ríkisstjórn. Ég persónulega hef engan áhuga á að vera slíkur né hefur Helgi Hrafn langað í það embætti. Væri t.d. ekki Smári McCarthy flottur forsætisráðherra, mér sýnist hann hafa margt gott til að bera til að valda því embætti?

Birgitta spyr hvort Smári McCarthy geti ekki orðið forsætisráðherra?