Bretar verða að skilja að það er engin leið til að þeir geti fengið aðild að sameiginlega markaðnum án þess að borga í sjóði Evrópusambandsins og undirgangast ýmsar reglur þess.

Þetta segir Börge Brende, utanríkisráðherra Noregs, en hann hitti í dag kollega sinn breskan, Boris Johnson, og David Davis sem fer með málefni úrsagnar Bretlands úr Evrópusambandinu.

Frá þessu segir í Guardian og er byggt á viðtali sem Brende átti við Radio 4 í Bretlandi.

Brende sagði að EES samningurinn virkaði ágætlega fyrir Norðmenn, en það væri óvíst hvort slíkur samningur myndi gagnast Bretum.

Við erum hluti af sameiginlega markaðnum, en það þýðir líka að við verðum að taka upp allt regluverkið og erum ekki í herberginu þegar ákvarðanirnar eru teknar. En það hefur verið samstaða um að það sé í hag Norðmanna að vera partur af sameiginlega markaðnum, og þess vegna þurfum við líka að leggja eitthvað af mörkum, til dæmis til nýrra aðildarríkja ESB og í þróunarsjóði sambandsins.

Brende sagði að EES samningurinn hefði verið gagnlegur fyrir Norðmenn, enda færu 70 prósent af útflutningi þaðan til ríkja ESB.

Brende sagði líka að Norðmenn myndu ekki stanada í vegi fyrir því að Bretar gengju í EFTA, sem er önnur stoð EES-samningsins. Það yrði að leggja mat á hvort vilji Breta standi til þess að taka þátt í slíku samstarfi með ofangreindum skuldbindingum. Hins vegar hafi Theresa May forsætisráðherra sagt að ekki sé unnið samkvæmt þeirri áætlun.

Guardian greinir frá því að í EFTA séu Noregur, Ísland, Liechtenstein og Sviss. Blaðið hefur eftir Brende utanríkisráðherra að þetta séu „einu alþjóðasamtökin þar sem Noregur er stórveldi“.