Ég er afar kátur með viðtökurnar sem Steinsteypuöldin hefur fengið, hef varla upplifað annað eins. Hér á vef RÚV er hægt að horfa á 4. þáttinn sem var sýndur síðastliðið fimmtudagskvöld. Hann fjallar um árin kringum 1960. Mér hafa borist alls kyns orðsendingar vegna þáttana, ég hef heyrt að þeir séu mikið ræddir og að fólk fari jafnvel og skoði staði og hús sem koma við sögu í þeim. Hér er ein sem mér þykir skemmtileg, frá Hallgrími Óskarssyni:
Afar góðir þættir. Unglingar mínir tveir fylgjast með og komu með einn ágætispunkt: Af hverju hættu menn að byggja falleg hús? Timburhúsamenningin var ægifögur, steinsteypuklassíkin einnig, fúnksjónalisminn þolanlegur en módernisminn hræðilegur. Okkar kynslóð ætlar að byrja á að byggja aftur falleg hús, segja þau, 12 og 14 ára og eru afar áhugasöm um þessa þætti. Ekki oft nú til dags sem við horfum öll á sömu þættina í línulegu dagskránni.
Eins og segir 4. þátturinn er hérna. Næsti þáttur fjallar svo um árin kringum 1975, uppbyggingu Breiðholtsins og áhuga sem spratt upp á gömlu byggðinni og verndun hennar en áður hafði staðið til að rífa hana meira og minna alla.
