Mörgum verður starsýnt á stórhýsið Laugaveg 91. Þar var eitt sinn verslunin Sautján, en langt er síðan hún lagði upp laupana í húsnæðinu. Þarna var í smátíma eins konar klasi hönnunarbúða, en annars hefur húsnæðið staðið autt um langt árabil.
Er virkilega ekki hægt að fá neina starfsemi í húsið sem stendur undir sér? Þarna væri auðvitað gaman að fá stóra fatabúð – eða vísi að department store eins og það heitir á ensku.
En húsið á sína sögu sem ekki allir muna núorðið. Það hefur tekið svo miklum breytingum að það er nánast óþekkjanlegt frá upphaflegri mynd.
Að Laugavegi 91 reisti Kaupfélag Reykjavíkur og nágrennis (KRON), sem þá var fjarska öflugt, verslanamiðstöðina Domus sem tók til starfa 1970. Þá leit húsið út eins og sjá má í meðfylgjandi auglýsingu. Þar má líka lesa að þarna fáist nýlenduvörur, leikföng, fatnaður, búsáhöld, gjafavörur, bækur og heimilistæki.
Þetta var á tímanum þegar samvinnufélögin voru enn stórveldi. Sambandið rak aðra slíka deildaskipta verslun niðri í miðbæ, í Austurstræti 10, þar sem nú er verslun ÁTVR á neðstu hæðinni.
