Í Steinsteypuöldinni í kvöld fjöllum við um árin í kringum 1960. Þetta er tími hinna hreinu flata. Geómetrían var alls ráðandi í sjónlistum og hún setur líka svip sinn á byggingalistina. Þetta er tími Sigvalda Thordarsonar – Sigvaldahúsin eru eru einhverjar eftirminnilegustu byggingar frá þessum tíma.

Eitt hið frægasta stendur við Ægissíðu – auðvitað í Sigvaldalitunum – en þar skammt frá á Tómasarhaganum er hús sem Gísli Halldórsson byggði sér. Í þættinum kemur fram skýring á því hvers vegna það er reist á súlum.

Fagurfræði þessa tíma var mjög eindregin. Til marks um það má nefna tvö hús. Morgunblaðshúsið sem reis við Aðalstræti og Rúbluna sem var byggð við Laugaveg. Þessi hús eru mjög svipuð að gerð. Morgunblaðshúsið var teiknað af hægrimanninum Gunnari Hanssyni en Rúblan var teiknuð af Sigvalda sem var sósíalisti.

Þátturinn er á dagskrá RÚV kl. 20.35 í kvöld.