Það er sérkennilegt að fylgjast með því þegar forráðamenn stærstu keðju matvöruverslana á Íslandi selja hlutabréf sín hver um annan þveran. Vísast græða þeir peninga á þessu, geta jafnvel farið að hafa það náðugt, en varla er hægt að skýra þetta öðruvísi en að þeir trúi ekki lengur á framtíð fyrirtækisins.

Það verður líka að segjast eins og er að verslanir Haga – Hagkaup og Bónus – eru ótrúlega staðnaðar. Vöruúrval er lélegt þar, hefur reyndar farið hrakandi fremur en hitt. En staðreyndin er sú að Íslendingar láta bjóða sér mjög lélegar matvörubúðir, úrvalið er slappt, verðið hátt, gæði vörunnar vafasöm, ferskleiki afar lítill.

Líklegasta skýringin á hlutabréfasölunni er auðvitað innkoma bandaríska verslunarrisans Costco á íslenskan markað. Allt bendir til þessa að vöruframboðið þar verði öðruvísi en við eigum að venjast. Álagningin sem tíðkast hjá fyrirtækinu er miklu lægri en tíðkast á Íslandi.

Verslun Costco verður víst ekki opnuð fyrr en í mars 2017, þannig að enn er dálítill tími til stefnu fyrir íslensku verslunina að aðlagast. Hlutabréfasalan bendir samt ekki til að mikill vilji sé til þess. Maður sér fyrir sér þúsundir viðskiptavina þyrpast í Costco á fyrsta degi. Í raun er hugsanlegt að það muni sprengja íslenska verslunarhætti í loft upp.

En hverjir ætli séu annars að kaupa hlutabréfin í Högum? Það eru þó ekki lífeyrissjóðirnir?