Aldrei var nú líklegt að árásir Davíðs Oddssonar á Guðna Th. Jóhannesson, sem byggja meðal annars á sérstæðum lestri á því sem hann hefur skrifað í fræðigreinum, myndu hafa mikil áhrif.

Þær kannski þétta raðirnar meðal innmúraðra en annars staðar hafa þær frekar vakið furðu en hitt.

Ný skoðanakönnun sem Fréttablaðið birtir sýnir að fylgið hefur litið haggast. Guðni er með rúmlega 60 prósent en Davíð er með 19. Munurinn er meiri en 40 prósentustig.

Það er spurning hvernig það muni gefast fyrir Davíð að halda áfram þessum árásum og bæta jafnvel í. Reynslan segir manni að margir í herbúðum hans séu á þeirri línu. En það blasir við að hann muni tapa í kosningunum og kannski frekar spurning um að komast frá þessu með þokkalegri sæmd.

Það eru ekki góðir kostir í boði fyrir hann. Það getur verið erfitt að þrauka í kosningabaráttu sem er nær örugglega töpuð og þar sem ekkert er að virka. Fylgismenn eru fljótir að missa móðinn og láta sig hverfa; það færist mikil deyfð yfir kosningaskrifstofuna.

Davíð getur reynt að halda áfram að höggva í sama knérunn, vera árásargjarn, en hætt er við að það virki eins og óöryggi og örvænting – og er býsna óforsetalegt. Hann auðvitað getur prófað að sýnast jákvæður – hugsa þá máski frekar um orðspor sitt eftir kosningarnar. Og svo er auðvitað möguleiki að hann hætti við – finni einhverja átyllu til þess.