New York Times birtir athyglisverða samantekt um ris pópúliskra flokka á hægri væng í Evrópu. Þarna eru flokkar sem vissulega eru misjafnir að gerð, sumir eru einfaldlega mjög þjóðernissinnaðir, aðrir slá út í að vera ný-fasískir.
Uppgangur þeirra nú um stundir er einna mestur í fyrrum ríkjum kommúnistablokkarinnar, Póllandi og Ungverjalandi, en líka í hinu geysilega vel megandi Austurríki. Flokkar af þessu tagi hafa einnig sótt fram á Norðurlöndunum, en það er athyglisvert að þeim verður lítið ágengt á Ítalíu, Spáni og Portúgal. Ítalir fengu kannski nóg með sinn Berlusconi og óstjórn hans um langt árabil, en á Spáni og Portúgal lifa enn minningar um fasistastjórnir sem þar sátu fram á áttunda áratug síðustu aldar.
Grafið sem birtist í New York Times byggir á kosningaúrslitum í tuttugu löndum. Stóra yfirlitsmyndin lítur svona út, en nánari útfærslu má sjá í greininni sjálfri.
