Hér hefur margsinnis á síðunni verið vitnað í Friðrik Jónsson sem hefur ritað ýmislegt skynsamlegt um efnahagsmál, meðal annars í bloggi hér á Eyjunni. Friðrik skrifar á Facebook í morgun og er tilefnið greinar sem birtast í Morgunblaðinu í dag:
Partur af vandanum er líka ákveðið viðhorfsvandamál gagnvart skattinum sem m.a. hefur verið hamrað á sérstaklega sl. aldarfjórðung af ákveðnum pólitískum öflum. Það viðhorf endurspeglast bæði Staksteinum Morgunblaðsins í morgun og í opnugrein varaþingmanns Sjálfstæðisflokksins í sama blaði. Að skattar séu í reynd í grunninn ósanngjarnir, ill nauðsyn og mestmegnis fari í einhverja óskilgreinda „hít“ hins opinbera – en ekki að hið opinbera sé framlenging af okkur sjálfum.
En eins og Friðrik bendir á er skattkerfið í raun hannað til hagsbóta fyrir ríkt fólk og eignafólk og þá sem hafa tekjur af fjármagni:
Það er ósköp einfaldlega þannig að skattkerfið í dag er mun frekar hannað af tillitsemi við hátekju- og eignafólk. Þeir einu sem greiða alla sína skatta til fulls eru almennt launafólk, þ.m.t. opinberir starfsmenn. Smávægilegir plástrar á móti koma í formi ýmissa – yfirleitt tekjutengdra – bótamillifærslna eins og húsnæðis- og barnabóta. Hinir raunverulegu skattafslættir felast t.d. í mismunun á skattlagningu fjármagns- og launatekna. Tekjur eru tekjur eru tekjur og réttlæting núverandi aðgreiningar er ekkert annað en þæfingarþvoglumál.
Ef menn sannarlega meina eitthvað með því að vilja einfalda skattkerfið og auka gagnsæið þá væri kannski rétt að byrja á því að hætta að gera þennan greinarmun.
Launafólk hefur heldur engan aðgang að aflandsfélögum eða not af slíkri starfsemi. En þangað sækja fjármagnseigendur –sem þó er boðið upp á afar hagfellt skattaumhverfi í heimalandinu.
Vegna aflandsfélagaumræðunnar er kannski rétt að hafa í huga að um sumt er hér um stigs- en ekki eðlismun að ræða varðandi hina ríkjandi tilhneigingu þeirra sem aðstöðu hafa til að koma sér hjá, eða draga úr (mínimisera), eins og mest þeir geta og mega skattgreiðslur. Að setja sitt í aflandsfélag er sumpart svona fyrsta farrýmis uppfærsla frá viðskipta farrýmis útfærslunni sem felst t.d. í að ehf-a sjálfan sig.
