Maður reynir að koma auga á hvað það gæti verið sem myndi leiða til þess að Píratar missi fylgi.

Ein er sú að þeim mistakist illilega að raða upp á framboðslista. Að framboðslistarnir verði barasta mjög óálitlegir. Það gæti gerst. Píratar munu væntanlega reyna að hafa valið á framboðslista sem lýðræðislegast, þeir hafa verið varaðir við lukkuriddurum, kveruúlöntum og einsmálsfólki. Kannski tekst þeim að sneiða framhjá því. En listauppstillingin mun reyna á Píratana.

Ungt fólk virðist ætla að kjósa Pírata í stórum stíl, en líklegt er að fylgi þeirra sem eldri eru hverfi að einhverju leyti aftur á gamlar slóðir. Samfylkingin ætti að geta endurheimt eitthvað af fylginu nema hún sé alveg heillum horfin – og Framsókn er þekkt fyrir að sveifla sér upp í kosningum. Það eru gömul sannindi að ekki er alltaf mikið að marka skoðanakannanir á miðju kjörtímabili. En fylgisaukningin hefur verið stöðug í næstum ár.

Svo eru það stefnumálin – jú, og framkvæmd stefnunnar. Birgitta Jónsdóttir hefur verið ótrauð að lýsa því yfir að Píratar vilji að næsta kjörtímabil – þar sem þeir komast hugsanlega til valda – verði stutt. Á landsfundi Pírata í ágúst síðastliðnum var samþykkt að það myndi snúast um tvö mál: Stjórnarskrána í útgáfu stjórnlagaráðs og þjóðaratkvæðagreiðslu um Evrópusambandið. Svo var greint frá samþykktinni eftir fundinn:

Að næsta kjörtímabil verði stutt og þar á þinginu verði eingöngu til umfjöllunar tvö mál; stjórnarskrármálið og aðildarumsóknin að Evrópusambandinu. Og þingið gangi út á það að samþykkja að færa þjóðinni þetta hvort tveggja; annars vegar í þjóðaratkvæðagreiðslu hvað varðar Evrópusambandsmálið og hins vegar að samþykkja nýja stjórnarskrá, sem sagt ný stjórnskipunarlög byggð á tillögum stjórnlagaráðs. Við höldum að þetta sé aðalmálið hjá þjóðinni.

Birgitta ítrekaði þetta varðandi stjórnarskrána í viðtali í sjónvarpsþættinum Eyjunni í dag.

En nú er spurning hvort kjósendur kæra sig yfirleitt um að ganga til kosninga upp á þau býti að þetta verði aðalmálin – og að kosið verði fljótt aftur? Og þingmennirnir sem verða kosnir fyrir Pírata (þeir eru nú 3 en verða kannski 25), verða þeir til í að gefa sætin sín eftir jafnóðum aftur?

Það gæti líka reynst býsna erfitt fyrir Píratana að útskýra þetta í kosningaumræðum: Tvö mál, stjórnarskrá og Evrópa. Hvorugt virkar eins og það sé ofarlega á listanum yfir forgangsmál kjósenda, að minnsta kosti ekki eins og sakir standa. Þetta misserið virkar a.m.k. eins og heilbrigðis- og velferðarmál séu efst á baugi.