Tölur um styrki til stjórnmálaflokka samkvæmt árskýrslum þeirra sem birtust í Íslandi í dag skýra íslensk stjórnmál ágætlega, betur en margt annað. Þar kom í ljós að 80 prósent af styrktarfé frá fyrirtækjum rennur til núverandi stjórnarflokka. Þarna er peningaslóðin.

Það kemur í ljós að fyrirtæki í sjávarútvegi styrkja stjórnmálaflokkana um 14,5 milljónir, af þessu renna 9 af hverjum 10 krónum til Sjálfstæðisflokks og Framsóknarflokks. Samfylkingin fær eitthvað lítilræði en VG, Píratar og Björt framtíð ekki neitt. Fyrirtæki í Vestmannaeyjum og Grindavík styrkja bara stjórnarflokkana, ekki aðra.

Ferðaþjónustan styrkir stjórmálaflokka sáralítið, þar er lítil hefð fyrir því að kaupa áhrif með þeim hætti, en fjármálafyrirtæki styrkja stjórnarflokkana um 7,7 milljónir en stjórnarandstöðuna um 3 milljónir – samkvæmt Íslandi í dag.

En bygginga- og fasteignafyrirtæki styrkja stjórnarflokkana um 9,6 milljónir en stjórnarandstöðuflokka um 2 milljónir.

Eitt af því sem er að fara með íslensk stjórnmál, veldur ógeði hjá kjósendum og stuðlar líklega að vinsældum Pírata, er hin grimma hagsmunagæsla stjórnmálaflokka, hin stóru hagsmunakerfi sem virðist ekki hægt að hrófla við.

Þessar tölur gefa okkur smá mynd af því hvernig það skrímsli lítur út.