Breytingar á íbúasamsetningu Bandaríkjanna og lífsviðhorfum valda því að frambjóðendur Repúblikana eiga varla neina von í forsetakosningum. Þetta skrifar kosningasérfræðingurinn Stan Greenberg í mjög áhugaverðri grein sem birtist í Guardian.

Hann byrjar á að lýsa furðufuglunum sem eru í framboði fyrir Repúblikanaflokkinn. Ben Carson sem segir að umbætur Obamas í heilbrigðismálum séu það versta sem hefur komið fyrir Bandaríkin síðan þrælahald. Hann sagði líka að Hitler hefði drepið færri gyðinga í helförinni ef þeir hefðu verið vopnaðir. Donald Trump sem segist ætla að reka burt 12 milljón skilríkjalausa innflytjendur af því meðal þeirra séu svo margir „glæpamenn, morðingjar og nauðgarar“. Og svo Carly Fiorina sem segir að hvert einasta stefnumál sem Hillary Clinton aðhyllist, þar á meðal launað fæðingarorlof og jöfn laun fyrir konur sé „sannanlega slæmt fyrir konur“.

Greenberg segir að bandaríska þjóðin sé að þróast burt frá svona viðhorfum. Minnihlutahópar, blökkumenn og fólk af suður-amerískum uppruna, einstæðar konur, þúsaldarkynslóðin (fólk fætt milli 1982 og 2000) og fólk sem er ekki trúað,  hafi verið 51 prósent af kjósendum árið 2012 en verði 63 prósent á næsta ári.

Í öllum þessum hópum hafi Demókratar meirihluta sem Greenberg segir að sé að minnsta kosti tveir á móti einum.

Þarna séu í raun að verða stórkostlegar samfélagsbreytingar. Borgir séu að ganga í gegnum mikla endurnýjun með atvinnugreinum sem spretta af upplýsingatækninni og nýjum orkugjöfum. Á sama tíma eru að verða miklar breytingar á viðhorfum til kynjahlutverka, innflytjenda, fjölskyldunnar og trúarbragða. Við blasir nýr samfélagslegur, efnahagslegur og pólitískur veruleiki sem Repúblíkanar streitast á móti – sú barátta verður æ vonlausari. Þeir sitja uppi með gamla kjósendur sem eru trúaðir, hvítir á hörund, líklega í hjónabandi og búa á dreifbýlli stöðum. Með slíkan kjósendahóp er æ ólíklegra að þeir geti náð forsetaembættinu.