Stöð 2 auglýsir að sýna eigi myndir frá heimsókn Churchills til Reykjavíkur 1941 í fréttatímanum í kvöld – þá væntalega í tilefni af því að David Cameron er að koma til Reykjavíkur. Það er vissulega fátítt að forsætisráðherra Bretlands komi til Íslands. Ég ók einmitt fram á bílalest Camerons við Alþingishúsið áðan.

Churchill kom hingað aðallega til að heilsa upp á breska heraflann sem þá var á Íslandi – landið var þá hernumið af Bretum. Þetta getur verið skemmtilegt að útskýra fyrir erlendu fólki.

Ýmsar sögur spunnust af komu Churchills, meðal annars að hann hefði eignað sér hitaveituna – stungið upp á því að Íslendingar færu að nota heitt vatn til að hita hús. Svo hefur líka verið rifjað upp að einn helsti ráðgjafi Churchills á þessum árum var Vestur-Íslendingurinn William Stephenson, stundum kallaður Intrepid. Og það er sagt að skipin í höfninni í Reykjavík hafi þanið flautur sínar þegar Churchill sigldi burt – til að hylla karlinn.

Mér finnst þó skemmtilegasta sagan vera sú að þegar Churchill steig upp á svalir þinghússins til að heilsa upp á mannfjölda sem stóð á Austurvelli hafði gleymst að tengja hjóðnema. Slík tæki voru vissulega til á þeim árum og vegna þessarar yfirsjónar heyrði enginn hvað Churchill sagði við Íslendinga þennan dag – og það verður aldrei vitað. Má segja að þar hafi tapast söguleg ræða.

Í þessu myndbandi má sjá Churchill á svölunum, með honum eru Hermann Jónasson forsætisráðherra og Sveinn Björnsson sem þá var ríkisstjóri, síðar forseti.

Og hér eru svo myndir af Churchill þar sem hann siglir frá Íslandi. Uppstillingarnar eru glæsilegar, hvernig hann stendur einn með þunga veraldarinnar á herðunum og horfir út á hafið.