Við fjölskyldan erum stödd í Bandaríkjunum – í Los Angeles. Höfum komið hérna nokkrum sinnum áður.

Þetta er undarlegur staður – mesta bílaborg veraldar sem nær yfir ótrúlegt flæmi.

Hér er einmuna verðurblíða, hitinn fór reyndar niður undir frostmark á gamlárskvöld. Það er mjög óvenjulegt.

Það eru andstæðurnar sem eru aðaleinkenni Bandaríkjanna. Við fórum á tónleika í hinni glæsilegu Disney-höll á gamlárskvöld. Við búum hjá vinum í hinu sterkefnaða strandhverfi Santa Monica. Hér eru frábærir veitingastaðir af öllum sortum, úrval í búðum er einstakt.

En hin hliðin dylst ekki. Um daginn gengum við að næturlagi inn í hið alræmda hverfi Skid Row. Þarna er stærsta samansafn heimilislauss fólks í Bandaríkjunum. Það er eins og að vera á stað þar sem skuggaverur svífa um – maður er kominn inn í myrkan og óttalegan heim. Það er jafnvel sagt að geðsjúkrahús láti fátæka sjúklinga út á Skid Row.

Skid Row er í gama miðbænum í Los Angeles. Hann hefur lengi verið niðurníddur. Nú eru hins viðhorf að breytast hjá ungu fólki. Það leitar inn í miðbæina og í miðborg Los Angeles er víða hafin endurreisn. Gamlar og glæsilegar byggingar og leikhús eru að ganga í endurnýjun. Það er sagt að hipsterarnir séu að taka yfir Downtown. Þetta er gleðilegt – en Skid Row er enn á sínum stað, spölkorn frá.

Þetta minnir okkur á hinn skelfilega ójöfnuð sem er stærsta mál samtímans.