Skýrsla umboðsmanns Alþingis er svo slæm fyrir Hönnu Birnu Kristjánsdóttur að við blasir að hún verði sett af sem varaformaður Sjálfstæðisflokksins á landsfundi sem halda á næsta haust.
Ekki aðeins skammaðist Hanna Birna út í lögreglustjórann í Reykjavík vegna málsins, hún dylgjaði um frændsemi sem réði gerðum lögreglunnar, hún hélt því statt og stöðugt fram að málið væri pólitískt og hún reyndi að fá blaðamennina sem fjölluðu um málið rekna. Fjölmiðlaviðtöl frá tíma málsins þar sem Hanna Birna reyndi að verða sér úti um samúð virka pínleg nú.
Hanna Birna gerðist sek um allsvakalegan dómgreindarbrest og stendur afar veikt sem stjórnmálamaður. Athyglin hlýtur líka að beinast að ráðgjöfum hennar – hverjir voru það sem véluðu svona um með henni?
Tryggvi Gunnarsson, umboðsmaður Alþingis kemur mjög sterkur út úr þessu máli, hann hefur staðið fastur á sínu, og gagnrýni um að hann hefði ekki átt að birta málsgögn missir algjörlega marks. Að sama skapi getur getur Stefán Eiríksson, fyrrverandi lögreglustjóri, staðið keikur.
