Menn velta því fyrir sér hvort skuldaútspil ríkisstjórnarinnar í dag tengist lélegu fylgi stjórnarflokkanna í skoðanakönnunum vegna sveitastjórnakosninga.

Það þarf svosem ekki að vera.

Skuldafrumvörpin eru komin inn í þingið og sagt er að í maí renni upp dagurinn þegar fólk getur farið að sækja um skuldaniðurfellingu – og að það verði eins auðvelt og að hringja eftir pítsu.

Það er deginum ljósara að skuldaniðurfellingin er ekki af þeirri stærðargráðu sem var lofað fyrir kosningar. Þegar allt kemur til alls er þetta ekki miklu meira en síðasta ríkisstjórn gerði. Ýmislegt sem hefur verið gert áður kemur til frádráttar. Það er sagt að aðgerðirnar snerti 100 þúsund heimili, en þá er gert ráð fyrir því að allir fari að taka séreignasparnað og nota hann til að greiða húsnæði.

Það getur verið skynsamlegt, sérstaklega ef skattaafsláttur fylgir, en auðvitað er fólk þarna einungis að breyta um sparnaðarform, setja sparnað í húsnæði í staðinn fyrir að geyma hann á reikningi. Ekki er víst að það hugnist öllum.

Margir eiga þó sjálfsagt eftir að fagna því að eigna- og skuldastaðan batnar. En það er spurning hvaða áhrif það hefur á hvernig Framsóknarflokki og Sjálfstæðisflokki reiðir af í kosningunum í lok maí. Eins og stendur eru horfurnar ekki góðar. Styrmir Gunnarsson spyr hvort Reykjavík sé orðin „rauð“.

Það er reyndar nokkuð vanalegt að flokkar sem eru í ríkisstjórn fái að finna til tevatnsins í sveitarstjórnakosningum. Slíkt veldur ókyrrð meðal almennra flokksmanna sem standa nærri sveitarstjórnum. Og refsingin getur sviðið í efri lögum flokkanna.

Halldór Ásgrímsson, sem var forsætisráðherra frá 2004 til 2006, sagði af sér embætti stuttu eftir að Framsóknarflokkurinn hafði fengið mikla útreið í sveitarstjórnakosningum 27. maí 2006. Halldór gaf þá forsætisráðuneytið eftir til Sjálfstæðisflokksins og Geirs Haarde.

Halldór Ásgrímsson sagði af sér sem forsætisráðherra eftir sveitarstjórnarkosningarnar 2006.