Hneyksli skekur matvælamarkaðinn í Bretlandi.  Prófanir sýna að 8 af 10 kjúklingum í breskum stórmörkuðum eru smitaðir af kampýlóbakter.

18 prósent af kjúklingunum höfðu kampýlóbakter í miklum mæli, í 6 prósentum tilvika fannst þessi ófögnuður á umbúðum.

Þetta kom í ljós eftir prófanir sem voru gerðar á sex mánaða tímabili.

Verst kom verslanakeðjan Asda út, en hlutfallið var aðeins lægra í Marks & Spencer og Tesco. Þó var kamfplóbakter í meira en tveimur þriðju kjúklinga í þessum verslunum.

Steve Wearne, sem er forstjóri FSA, matvælaeftirlitisins í Bretlandi segir að framleiðendur verði að taka sig verulega á og að neytendur þurfi að vera á verði. Um 280 þúsund manns sýkjast af kampýlóbakter í Bretlandi á hverju ári.

Tim Lange, sem er prófessor í matvælafræði við London City University og ráðgjafi stjórnvalda varðandi matvælaeftirlit, gengur lengra. Hann segir að almenningur eigi að hætta að kaupa kjúklinga. Það þurfi að bregðast hart við þessari fráleitu stöðu. Þetta sé sé eitt stærsta hneyksli í sögu matvælaiðnaðarins í Bretlandi, ekki minna en þegar menn voru að setja alls kyns aukaefni í mat á 19. öld.