Bryndís Loftsdóttir varaþingmaður fær aldeilis liðsmann í báráttunni gegn hækkun matarskatts í Reykjavíkurbréfi Morgunblaðsins í dag.
Sjálfur Davíð Oddsson kallar hækkunina „rugl“ og segir að mótvægisaðgerðirnar séu „dularfullar“.
Bryndís mátti sitja undir ásökunum um að vera óflokksholl – Brynjar Níelsson spurði fyrir mánuði síðan hvort hún ætti ekki að skipta um og fara í annað lið.
Margir þingmenn Framsóknarflokksins hafa stigið fram og mótmælt hækkun matarskattsins – svo mjög að spurning er hvort meirihluti er fyrir þessari ráðstöfun á þingi. Davíð Oddsson hefur verið býsna hallur undir Framsókn í seinni tíð – þarna fá framsóknarþingmennirnir vissulega stuðning.
En þá er spurning hvað hefur farið á milli Sigmundar Davíðs Gunnlaugssonar og Bjarna Benediktssonar. Bjarni getur trauðla bakkað með matarskattshækkunina, hann hefur lagt of mikið undir til þess. Fjárlög þarf að samþykkja fyrir þinghlé í desember.
Skuldaniðurfærslan sem var tilkynnt á mánudaginn var aðeins ríflegri en búist var við. Er hugsanlegt að á móti hafi Framsókn gengist undir matarskattshækkunina?
