Afar margir hafa deilt á Facebook viðtali við Jón Steinsson hagfræðing sem flutt var á Rás 2 í gær.

Þar sagði Jón að tækifæri væru til að stórbæta lífskjör á Íslandi.

Jón nefndi tvennt í þessu sambandi:

Uppboð á aflaheimildum sem gæti skilað 10 til 30 milljörðum króna í ríkiskassann árlega.

Og sæstreng til Bretlands sem gæti skilað 50 milljörðum í ríkissjóð á ári. Hann segir að nú séu álfyrirtæki að fá orkuna á „tombóluverði“.

Í samantekt um viðtalið segir:

Það er til staðar tækifæri til að gjörbylta lífskjörum á Íslandi vegna þess að Íslendingar búa yfir verðmætum náttúruauðlindum. Norðmenn eru ríkasta þjóð í heimi, við búum yfir náttúruauðlindum sem eru ekki ósvipaðar að verðmætum á hvern íbúa. Við gætum alveg eins verið jafn rík og Norðmenn.“

Jón segir fjársterka hagsmunaaðila standa í vegi fyrir þessum breytingum; þeir hafi tögl og haldir í umræðunni og beiti „linnulausum áróðri“.

Það er samt svo skrítið að þegar bent var á að þessi lífskjarabylting Jóns fæli í sér umræddan sæstreng – kannski lásu menn aldrei lengra en fyrirsögnina – þá reyndust flestir sem deildu fréttinni eða tjáðu sig vera á móti slíkri framkvæmd.

Og ekki heyrði ég betur í viðtalinu en að Jón mælti með einkavæðingu í heilbrigðiskerfinu…