Það er svolítið erfitt þegar ráðamenn tala til að dylja það sem er í rauninni að gerast – á ensku er þetta kallað doublespeak. Tungumálinu er misþyrmt til að að fela veruleikann.

Það er svona þegar umhverfisráðherrann talar um Norðlingaölduveitu. Í raun er er orðum hans þannig háttað að það er varla hægt að ræða við hann um málið. Jú, það er rétt hjá honum, friðlandið við Þjórsárver er að stækka, en staðreyndin er auðvitað sú að það stækkar minna en ráð hefur verið fyrir gert. Og ráðherrann reynir að dylja með orðum sínum að ástæðan sé sú að til standi að hefja framkvæmdir við Norðlingaölduveitu.

Það er eiginlega ráðgáta hvers vegna hann talar ekki skýrar? Finnst honum sjálfum að málstaðurinn sé svo slæmur að þurfi að þæfa málið?

Svo er það heilbrigðisráðherra sem segir að stórfelldar hækkanir komugjalda á heilbrigðisstofnanir séu í ágætu samræmi við fyrirheit ríkisstjórnarinnar um að hækka ekki gjaldskrár. Hækkunin er um 20 prósent. Það sem er líka merkilegt í þessu er að ráðherranum tekst að segja að við þetta batni hagur almennings.