Það er í tísku að setja alls konar hluti fram með kortum. Tölvutæknin hjálpar þar til. Hér er skemmtileg síða af bloggi Washington Post þar sem má sjá kort sem skýra alls konar hluti, allt frá framrás Mongóla á síðmiðöldum til fólksfjölgunar í heimi nútímans.

Hér er líka kort þar sem má sjá skiptingu lands og hafsvæða á norðurhveli. Þetta er ágætt innlegg í alla norðurslóðaumræðuna. Við sjáum þarna að hlutur Rússa er langstærstur. Grænland, Kanada og Noregur eiga líka stóran hlut, Bandaríkin koma þarna líka að vegna Alaska, en Ísland lafir rétt á útjaðri svæðisins.

Ísland á lítið tilkall til mögulegra auðlinda í Norður-Íshafinu. Hins vegar er rætt um möguleika varðandi siglingar yfir Norðurskautið, að þá verði hugsanlega til umskipunarhöfn á Íslandi. Líklegast er þó að það verði ekki nema flutningarnir fari beint yfir Norðurpólinn, sé farið Norðvesturleiðina, norður fyrir Kanada, eða Norðausturleiðina, norður fyrir Rússland, er ólíklegt að sé nokkuð vit í að stoppa á Íslandi.

Annar möguleiki gæti verið að Ísland njóti aukinnar auðlindavinnslu á Grænlandi með því að halda uppi samgöngum þangað og þjónustu.