Fréttirnar af rannsókninni á „erlendum áhrifaþáttum“ hrunsins verða æ skrítnari. Og auðvitað er þetta komið út í hefðbundið rifrildi – öðruvísi getur það ekki farið þegar horft er til rannsakendanna.

Af þessu er algjörlega augljóst að afar fáir munu taka mark á rannsókninni. Það eru komnir risastórir fyrirvarar – sem helgast af fyrri störfum þeirra sem ætla að rannsaka og yfirlýstum skoðunum þeirra.

Vilji menn gera þetta almennilega er líklega nauðsynlegt að fá til þess erlenda sérfræðinga. En svo má líka alveg sleppa þessu.

Þetta væri svosem ekki tiltökumál ef nokkrir háskólamenn hefðu tekið sig saman um þetta verkefni, innan vébanda einhverrar rannsóknastofnunar. En þegar fjármálaráðuneytið er farið að láta stórfé í verkefnið – þá gegnir náttúrlega öðru máli.

Svo er náttúrlega enn einn möguleiki til í stöðunni. Hann er fjarlægur – nefnilega sá að Hannes og Birgir Þór komi okkur á óvart með því að vera alveg hlutlægir.

En það er fjarska ólíklegt.