Það virðist ætla að fara eins og var spáð á þessari síðu að Sóley Tómasdóttir yrði forseti borgarstjórnar, Björn Blöndal formaður borgarráðs og Dagur B. Eggertsson borgarstjóri. Píratinn Halldór Auðar Svansson fær svo sæti í borgarráði. Líklega er það sögulegt – ætli Reykjavík sé ekki fyrsti staðurinn í heiminum þar sem Píratar komast beinlínis til valda.

Í minnihlutanum sitja svo Sjálfstæðisflokkurinn og Framsókn. Eins og hefur áður verið sagt er sjálfsagt að minnihluti/meirihluti sé ekki algilt lögmál. Í síðustu borgarstjórn var gott samstarf við suma af borgarfullrtrúum Sjálfstæðisflokksins í ýmsum málum. Það ætti að vera hægt áfram, en fer dálítið eftir því hversu menn ætla fara út í mikinn flokkspólitískan ham.

Það er meiri spurning með Framsóknarkonurnar Sveinbjörgu og Guðfinnu. Þær komust inn í borgarstjórnina á afar skrítnum forsendum og einhvern veginn virkar það þannig að löngunin til að starfa með þeim sé ekki sérlega mikil – að minnsta kosti um sinn.

Enn eru þær að súpa seyðið af harðri gagnrýni innanflokks – síðastur til að stíga fram var Ingvar Gíslason, fyrrverandi menntamálaráðherra, sem talar um framboðsklúður án hliðstæðu í næstum 100 ára sögu flokksins.

Annars virðist meirihlutinn nýi vera nokkuð traustur, hann styðst við níu borgarfulltrúa af fimmtán. Með því að hafa bæði VG og Pírata með er því varnað að annar hvor flokkurinn komist í oddaðstöðu – það virðist vera skynsamlegt. En því skal spáð hér að þessi meirihuti haldi næstu fjögur árin og Dagur taki sitt heila kjörtímabil sem borgarstjóri.