Maður áttar sig ekki alveg á því hver er staðan varðandi hátæknisjúkrahúsið svokallaða. Framsóknarmenn voru komnir í nokkuð harða andstöðu gegn því fyrir kosningar, þótt reyndar hafi verkefnið fyrst og fremst verið keyrt áfram af framsóknarmönnum hingað til.

Er ennþá ætlunin að byggja þennan risastóra spítala á þessum stað?

Í deilunum um flugvöllinn virðast menn gefa sér það – maður heyrir í fólki sem er á alveg á móti því að spítalinn sé við Hringbraut en er á sama tíma á móti því að

En einhvern veginn virðist í hugum margra vera búið að líma saman flugvöll og sjúkrahús.

Þetta er samt ekki það sem ég ætlaði að ræða um.

Á ráðstefnunni Í byrjun tveggja alda sem ég sat á Vestfjörðum um helgina kom fram í einu erindinu að fyrr á tíð hefðu menn reist sjúkrahús í því sem telst vera heilnæmt umhverfi. Þar má til dæmis nefna Vífilsstaðaspítala og Kristneshælið og að sumu leyti Landspítalann þegar hann var byggður, hann var þá á mörkum bæjarins með stórt grænt svæði í kring.

Nú stendur til að troða stóra spítalanum niður á þröngu svæði. Þarna verður ógurlegt magn steinsteypu, bílabrautir allt í kring. Það verður afar litið pláss fyrir gróður, garða eða náttúru, ef marka má teikningarnar sem maður hefur séð. Yfirleitt eru landslagsarkitektar kallaðir síðastir að svona verkefnum og látnir pota niður nokkrum runnum.

Á ráðstefnunni kom fram að þess væri aftur farið að gæta í skipulagsfræðum og arkítektúr að reisa sjúkrahús þar sem eru tengsl við náttúruna – að heilnæmt umhverfi geti verið læknandi ellegar líknandi.

Það meikar alveg sens.

Landspítalinn var reistur á grænu svæði aðeins utan við borgina. Hið sama má segja um aðrar sjúkrastofnanir þess tíma, þær voru í heilnæmu umhverfi. Nú stendur til að troða óskaplegu magni af húsum og steinsteypu á þennan blett. Þá verður lítið eftir af gróðri og grænum svæðum.