Upphlaup sem varð út af fjárveitingum til menningarmála er dæmigert fyrir umræðuna á Íslandi.

Grímur Gíslason  í Vestmannaeyjum segist telja að megi skera niður í menningarmálum um 40 til 60 milljarða.

Okkur varðar í sjálfu sér ekki mikið um skoðanir þessa manns, en þær eru gerðar að frétt. Hann er þó sveitarstjórnarmaður fyrir Sjálfstæðisflokkinn, en ræður náttúrlega litlu um ríkisfjármálin. Og þá er fjandinn laus.

Vestmannaeyingar eru kallaðir öllum illum nöfnum á netinu. Rithöfundurinn Sjón segir að besta fólkinu í Vestmannaeyjum hafi verið rænt af Tyrkjum.

Svona er auðvitað hægt að rífast áfram og líklega hafa sumir gaman af því.

En svo má skoða tölurnar eins og þær eru í alvörunni.

60-70 milljarðar króna fara í heildina í málaflokka sem heyra undir menntamálaráðuneytið. En þar er menntakerfið miklu stærri póstur en menningin.

En hér má sjá hvernig tölurnar líta út í nýlegri skýrslu um stuðning við skapandi greinar. Framlögin 2012 eru allt í allt um 10 milljarðar. Þau hafa lækkað frá því árið 2009 – enda stóð yfir tímabil niðurskurðar. Fjárveitingarnar hafa lækkað að nafngildi – og auðvitað enn meira að raungildi. Þarna má líka sjá skiptinguna milli greina.

Svo má líka vísa í aðra skýrslu sem gerð var um hagræn áhrif skapandi greina. Þau eru ansi mikil miðað við það sem ríkið leggur í þennan málaflokk – og geta talist einn helsti atvinnuvegur á Íslandi. Veltan er sögð vera um 200 milljarðar króna – og störfin sem skapast um 10 þúsund. Segir að auk þess að hafa hagrænt gildi hafi skapandi greinar menningarlegt gildi, virki sem aðdráttarafl fyrir ferðamenn og auki lífsgæði.