Nú er einkum einblínt á hvort Framsóknarflokknum tekst að efna loforð um skuldaniðurfellingar. Það má ljóst vera eftir kosningabaráttuna að þetta yrði málið sem ríkisstjórnin yrði einkum krafin svara um.

En það er annað mál, sem var líka rætt í kosningabaráttunni, sem er miklu stærra.

Sú staðreynd að lánamarkaðurinn á Íslandi er mannfjandsamlegur.

Framsóknarflokkurinn boðaði afnám verðtryggingar í kosningunum og nú starfar nefnd til að skoða það.

En það er miklu fleira sem spilar þarna inn í. Yfirgengilegur vaxtamunur, óhagkvæmt bankakerfi, Íbúðalánasjóður sem er á hausnum, há ávöxtunarkrafa lífeyrissjóða, stimpilgjöld, óstöðugt hagkerfi og gjaldmiðill sem sveiflast upp og niður –  jú, og beinlínis fjandsamlegt viðhorf í garð lántakenda.

Ein helsta röksemd þeirra sem vilja ganga í Evrópusambandið hefur verið að þá færist kjör lántakenda nær því sem gerist í nágrannalöndum. Nú er ljóst að við erum ekki á leið þangað inn og að krónan verður gjaldmiðill okkar um næstu framtíð.

Því er enn brýnna að stjórnvöld ráðist á þennan vanda, að hér verði til lánamarkaður sem þjóni fyrirtækjum og fólki fremur en að hneppa það í ánauð.