Um Bókmenntahátíð í Reykjavík hefur verið sagt að höfundum þyki gaman að koma á hana vegna þess að hún er frekar smá í sniðum, það er mikil nálægð milli höfunda og lesenda, hjarðir af fjölmiðlamönnum eru ekki að þvælast fyrir, það er ekki mikið snobb í gangi, bukt eða beygingar – hátíðin er semsagt frekar intím. Notaleg.

Bókmenntahátíð stendur þessa dagana yfir í Norræna húsinu og Hörpu og það er rétta að benda á að hver sem er getur farið, viðburðir hátíðarinnar eru opnir almenningi og að kostnaðarlausu.

Þarna eru meðal gesta margir ágætir innlendir höfundar.

Við getum nefnt Hollendinginn Hermann Koch sem í bókinni Kvöldverðurinn lét lesendum líka dáindis vel við mann sem reynist síðan vera illmenni. Það þarf nokkra getu í ritlistinni til að ná því.

Hvít-Rússinn Svetlana Alexievits er óþreytandi við að afhjúpa. Hún tekur viðtöl við fólk á svæðum þar sem hafa dunið yfir hörmungar og raðar sögubrotunum saman – frægust er bók hennar Raddir frá Tsjernóbýl.

Kiran Desai skrifaði Bookerverðlaunasöguna The Inheritence of Loss. Þetta er stór skáldsaga, gerist á þremur meginlöndum og á mismunandi tímaskeiðum, fjallar um fólk á Indlandi sem finnur sér ekki stað í veröldinni, ekki heima hjá sér, ekki í Bretlandi, ekki í Bandaríkjunum. Þetta er einhver besta bók sem hefur verið skrifuð um hlutskipti innflytjenda.

Rachel Joyce er metsölurithöfundur í Bretlandi – og líka á Íslandi. Bók hennar Hin ótrúlega pílagrímssaga Harolds Fry hefur notið mikilla vinsælda og nú er hún komin með aðra bók, líka á íslensku, Árið sem tvær sekúndur bættust við tímann.

Kjell Espmark skrifaði frábæra ljóðabók sem var þýdd í heild sinni á íslensku og nefnist Vetrarbraut. Við hældum henni á hvert reipi í Kiljunni um árið. Espmark hefur að auki ráðið miklu um hver fær Nóbelsverðlaun með veru sinni í Sænsku akademíunni.

Nuka K. Gotfredsen er höfundur frábærra teiknimyndasagna þar sem er sagt frá upphafi byggðar á Grænlandi, Georgi Gospodinov er höfundur fyrstu búlgörsku bókarinnar sem kemur út á íslensku, hún er alveg meinfyndin og Madeleine Miller er menntuð í fornfræðum og skrifar um ástir fornkappanna Akkillesar og Patóklusar.

Svona má lengi telja. Dagskrá hátíðarinnar má finna hérna.