Það er látið eins og ekki séu til neinir valkostir við að hafa flugvöll í Vatnsmýri, eins og engar málamiðlanir komi til greina. Málið er orðið eilíf uppspretta kergju og vanlíðunar – það er alltaf hægt að nota það til að búa til leiðindi milli landsbyggðar og höfuðborgar. Einhvern tíma verður þetta að hætta.
Það er ljóst að flugvöllur þyrfti að vera talsvert minni en sá sem er í Vatnsmýri. Það er alveg ástæðulaust að flugvöllur í Reykjavík sé varaflugvöllur fyrir Keflavík. Aðrir flugvellir gegna því hlutverki. Flugvélar í innanlandsflugi þurfa styttri flugbrautir en áður, og það er sagt að þær eigi eftir að styttast enn.
Svo hentar völlurinn í Vatnsmýri afar illa fyrir annað flug vegna þess hvað hann er nálægt þéttustu borgarbyggð á Íslandi. Æfingaflug á ekki heima þar og ekki einkaflug með smáflugvélum eða sportflug – hvað þá flug einkaþota.
Sá valkostur að flytja flugið til Keflavíkur er ekki góður. Þau rök eru nokkuð skotheld að það sé of langt þaðan í bæinn fyrir fólk sem þarf að skreppa út til og frá borginni. Það myndi ekki breytast nema menn færu út í mikil umferðarmannvirki, þannig að væri hægt að komast til Keflavíkur á 20-25 mínútum. Að vissu leyti tapar landsbyggðin reyndar á þessu. Það væri að mörgu leyti hentugt bæði fyrir íbúa hennar og fyrir ferðamenn að geta skipt yfir í flugvél í innanlandsflugi strax á alþjóðaflugvellinum.
Eins og staðan er núna þurfa allir sem vilja gera þetta að koma til Reykjavíkur og gista þar.
Sjúkraflugsrökin eru mikið notuð í umræðunni um flugvöllinn. Það er nokkuð ofmælt að sjúkrahús þurfi að vera við endann á flugbraut. Staðreyndin er sú að langflest tilvik sem koma á Landspítalann fara í bíl, það á líka við um bráðatilvikin. Þar skipta mínúturnar líka máli. Ættum við kannski líka að velta fyrir okkur hvort spítalalinn væri ekki betur staðsettur utan við þéttustu byggðina í miðjunni?
Það má vel hugsa sér annað og kannski betra fyrirkomulag sjúkraflugs en að hafa miðstöð þess á Akureyri, þaðan sem flugvélar Mýflugs (sem annast sjúkraflugið) þurfa að komast um landið til að ná í sjúklinga. Þarna þarf að horfa á mál í víðu samhengi við heilbrigðiskerfi sem er í afar lélegu ásigkomulagi – bæði hér á Stór-Reykjavíkursvæðinu og úti á landi.
Það er kominn tími til að hugsa í lausnum. Reykjavíkurflugvöllur þarf alls ekki að vera það ferlíki sem hann er. Landið undir honum er afar verðmætt fyrir framtíðarþróun borgarinnar. Seinna er líklegt að byggð þar myndi teygja sig með brú út á Álftanes – það hefur verið stungið upp á að færa flugvöllinn út á landfyllingar í Skerjafirði eða jafnvel hlaða garða um hann þar.
Það er ein hugmyndin. Önnur gæti verið að minnka flugvöllinn mikið og setja hluta hans út á landfyllingar og skapa þannig rými fyrir byggð.
Svo er hér ein hugmynd sem virkar ansi vel – og aftur með þeim formerkjum að flugvöllurinn þarf alls ekki að vera eins stór og hann er nú.
Eins og við sjáum er þarna kominn flugvöllur á Bessastaðanes. Spítali hefur verið settur þar við hliðina á, það er þó kannski óþarfi að hann sé svo nálægt flugvellinum. Aðflugslínur eru aðrar en á Reykjavíkurflugvelli, þær eru yfir fámennari byggð og líka mun hærra yfir byggðinni.
