Meðal efnis sem við Ragnheiður Thorsteinsson og Jón Víðir Hauksson tókum upp í Vesturheimi í vor var söngur Christine Antenbring.

Hún er stórkostleg söngkona, með mikla rödd og tjáningu.

Christine er af íslenskum ættum. Hún átti söngferil, en gerði hlé á honum, meðal annars vegna barneigna. Þegar hún sneri aftur hafði rödd hennar breyst, hún var orðin stærri og hljómmeiri. Telst vera mezzósópran.

Christine söng fyrir okkur Draumalandið eftir Sigfús Einarsson, þá elskuðu söngperlu, og Ave Maria eftir Kaldalóns. Hún hefur sérstaklega verið að stúdera íslensk sönglög ásamt eiginmanni sínum og undirleikara Mikhail Hallak.

Hún söng Draumalandið í Carnegie Hall í New York í mars síðastliðnum við rífandi undirtektir.

Christine Antenbring syngur í Hörpu á Menningarnótt klukkan 20. Það verður enginn svikinn af því að fara og hlýða á söng hennar. Á efnisskránni eru íslensk lög.Söng hennar má svo heyra í þáttum okkar frá Vesturheimi í Sjónvarpinu síðar í vetur.