Ég ætla að setja fram litla kenningu.

Nú er í gangi undirskriftasöfnun með því að hafa flugvöllinn áfram í Vatnsmýri. Það er rífandi gangur í henni og ekki von á öðrum, það er auðvelt að vekja upp æsing í kringum þetta mál.

Sjálfstæðisflokkur og Framsóknarflokkur munu sjá að þetta er eina málið sem þeir geta notað gegn Besta flokknum. Eins og staðan er núna eiga þessir flokkar ekki mikil sóknarfæri í borgarstjórnarkosningunum næsta vor.

Annar flokkurinn – eða þeir báðir – munu setja þetta mál á oddinn. Það myndi þýða að Sjálfstæðisflokkurinn þyrfti að kveða Gísla Martein í kútinn og jafnvel fleiri í borgarstjórnarflokknum sem eru hlynntir því að flugvöllurinn fari. Nýtt fólk kæmi inn í stað þeirra.

Það er auðveldara fyrir Framsókn að gera þetta að aðalkosningamálinu.

Kannski gengur þetta upp, eins og ég segi, það er auðvelt að skapa ýfingar kringum flugvallarmálið. En það gæti líka mistekist, stórum hluta borgarbúa er hjartanlega sama hvort flugvöllurinn er eða fer og þá aðallega þeir sem búa í efri byggðum og út með Sundunum.

En það væri semsagt hægt að líta á þessa undirskiftasöfnun sem upptakt að borgarstjórnarkosningunum.