Í Kiljunni á miðvikudagskvöld fjöllum við um endurminningar Kristínar Dahlstedt veitingakonu. Þær komu út 1961 en hafa nú verði endurútgefnar.

Ferill Kristínar var mjög litríkur. Hún var frá Dröngum í Dýrafirði, og vegna kynna við Magnús Hjaltason, skáldið á Þröm, verður hún persóna í Heimsljósi Halldórs Laxness.

Hún fór til Danmerkur og lærði veitingarekstur, rak mörg veitingahús um dagana, sum glæsileg, önnur miður.

Við fáum í þáttinn sænska rithöfundinn Viveca Sten. Hún er höfundur bókaflokks sem gerist í bænum Sandhamn í sænska skerjagerðinum, þetta eru glæpasögur sem hafa notið mikilla vinsælda og selst í risaupplögum Svíþjóð. Fyrsta bókin eftir Viveca Sten er komin út á íslensku og nefnist Svikalogn.

Við kynnumst ljóðskáldinu Degi Hjartarsyni sem fékk bókmenntaverðlaun Tómasar Guðmundssonar fyrir bókina Þar sem vindarnir hvílast og fleiri einlæg ljóð.

Margrét Tryggvadóttir alþingismaður segir okkur frá uppahaldsbókum sínum, hún starfaði við bókaútgáfu áður en hún fór á þing.

Gagnrýnendur þáttarins fjalla um tvær bækur: Smásagnasafnið Ást í meinum eftir Rúnar Helga Vignisson, en bókin sú fékk menningarverðlaun DV í síðustu viku, og Líf annarra en mín eftir Emmanuel Carrère.

Bragi segir frá félagsskap gáfumanna sem hann tilheyrði sem ungur maður og sýnir merka mynd sem Alfreð Flóki teiknaði af félögunum.

Kristín Dahlstedt rak veitingahús víða um Reykjavík. Þeirra frægast var Fjallkonan sem starfaði á nokkrum stöðum við Laugaveg – um tíma var yfir henni mikill glæsibragur. Svo var þó ekki alltaf á veitingaferli Kristínar.