Það er erfitt að spá næstum tvo áratugi fram í tímann. Í Guardian má lesa spá Center for Economic and Business Research þar sem segir að Bretland verði orðið stærra efnahagsveldi en Þýskaland árið 2030.

Það má vel vera – þessi spá getur ræst, en svo getur hún líka brugðist.

En það er merkilegt að sjá á hverju spáin byggir, nefnilega ekki síst á íbúasamsetningu Bretlands. Hún ræðst aftur af innflytjendum.

Innflytjendur eru fjölmennir í Bretlandi – og þeir eignast gjarnan mörg börn.

Á móti segir að fólksfjölgunarþróun gæti orðið óhagstæð í Þýskalandi.

Merkilegt er svo að setja þetta í samhengi við umræðu um innflytjendamál í Bretlandi. Þar hefur Íhaldsflokkurinn verið að ganga býsna langt, að nokkru leyti af ótta við að missa fylgi sitt til Ukip, flokks Nigel Farage. Flóttamannastofnun Sameinuðu þjóðanna fordæmir nýja löggjöf um innflytjendamál. David Cameron hótar líka að segja nei við frekari stækkun Evrópusambandsins ef ekki eru gerðar ráðstafanir til að stöðva fólksflutninga frá  löndum eins og Rúmeníu og Búlgaríu.

En það er að sönnu þversagnakennt ef velmegun í framtíðinni byggir á innflytjendum sem verða fyrir barðinu á svo neikvæðri umræðu?