Björt framtíð hefur birt lista sinn fyrir borgarstjórnarkosningarnar – maður spyr reyndar hvað liggur á, það er hálft ár til kosninga?

En listinn er kominn fram og er, ja, það verður að segja eins og er – hann er ekki sérlega sterkur.

Þarna er Björn Blöndal, aðstoðarmaður Jóns Gnarr, í fyrsta sæti. Björn nánast óþekktur maður – og á alveg eftir að sanna sig fyrir kjósendum.

Fyrir neðan eru borgarfulltrúar úr Besta flokki sem hafa ekki verið sérlega áberandi, Elsa Yeoman og Eva Einarsdóttir. Mesta athygli vekur Ilmur Kristjánsdóttir í þriðja sæti.

Í neðstu sætum listans, heiðurssætunum, eru svo borgarfulltrúarnir Páll Hjaltason, Karl Sigurðsson og Einar Örn Benediktsson, þeir ætla semsagt ekki að vera með lengur.

Þessi listi er satt að segja afskaplega ólíklegur til að ná fylgistölum Besta flokksins, þannig að það gæti verið lag fyrir aðra flokka.

Maður tekur líka eftir því að þorri þeirra sem eru á framboðslistanum eru einhvers konar listafólk. Það gekk í Besta flokknum, þegar Jóns Gnarr naut við, en skyldi það ganga nú þegar framboðið nefnist Björt framtíð og er hluti af venjulegum stjórnmálaflokki?

Samfylkingin teflir líklega fram Degi B. Eggertssyni, Björk Vilhelmsdóttur og Hjálmari Sveinssyni í efstu sætum en óvíst er hverjir verða í efstu sætum hjá Vinstri grænum, hvort t.d. Sóley Tómasdóttir heldur áfram. Rósa Björk Brynjólfsdóttir hefur verið nefnd sem hugsanlegur arftaki hennar.