Rússar hafa alla tíð beitt þjóðirnar sem eru næst þeim miklum fautaskap. Það er illt að vera nágranni Rússlands. Það hafa Kákasusþjóðir fengið að reyna, Eystrasaltsþjóðir, Pólland – og náttúrlega Úkraína.

Í dag voru mótmæli í Kiev í Úkraínu vegna þess að forseti landsins, Viktor Janukovits, hefur stöðvað samstarfssamning við Evrópusambandið. Lögregla barði á friðsömum mótmælendum.

Þetta er stór og mikill samningur, hefur mikla efnahagslega þýðingu fyrir Úkraínu, að honum hefur verið unnið í sex ár.

En Pútín segir nei. Hann vill þetta ekki. Og Úkraínuforseti hlýðir. Rússar vilja að Úkraína sé á þeirra áhrifasvæði og hvergi annars staðar.

Þetta er bitur upplifun fyrir þá Úkraínumenn sem vilja að landið færist nær vestrinu. „Það er búið að stela draumi okkar um að lifa í venjulegu landi,“ segir Vitaly Klitsjko sem ætlar að bjóða sig fram til forseta Úkraínu árið 2015.