Þorbjörg Helga Vigfúsdóttir ætlar ekki að taka sæti á lista Sjálfstæðisflokksins í borgarstjórnarkosningunum. Það kemur ekki sérlega mikið á óvart eftir útkomu hennar í prófkjörinu á laugardag.

Það er hins vegar missir fyrir flokkinn að Þorbjörg sé ekki á listanum, hún er frjálslynd stjórnmálakona sem höfðar til margra sem hrífast kannski ekki endilega af körlunum þremur sem leiða listann.

Sjálfstæðisflokkurinn er raunar sérlega ósamstæður um þessar mundir. Í upphafi var hann stofnaður upp úr Íhaldsflokknum og Frjálslynda flokknum – ef til vill má segja að þær meginlínur einkenni flokkinn nú.

Íhaldsmennirnir hafa verið ofan á – hinir frjálslyndu eru lúpulegir og láta lítt að sér kveða. Það er helst að þeir huggi sig við Kögunarhól Þorsteins Pálssonar í Fréttablaðinu.

Það flækir svo málin hversu mikil ítök ritstjóri Morgunblaðsins hefur í hugum flokkmanna. Þeir lesa leiðara Morgunblaðins á hverjum degi. Forysta flokksins óttast hann og ekki að ástæðulausu. Hann fór illa með hana í Icesavemálinu.

Halldór Halldórsson, sveitarstjórnarmaðurinn margreyndi, sem sigraði í prófkjörinu fær heldur kaldar kveðjur úr Hádegismóum. Það er beinlínis hraunað yfir Halldór enda hefur hann afstöðu sem gengur glæpi næst á þeim bæ:

„Frambjóðandinn sem hlaut efsta sætið í prófkjörinu, með mjög ósannfærandi útkomu, kemur úr hópi áköfustu áhugamanna um að koma Íslandi í ESB, hvað sem tautar og raular. Sá hópur er mjög fámennur í Sjálfstæðisflokknum. Prófkjörið er því flokknum gagnslítið, eins og fyrr sagði.“