Nú styttist í leikinn við Króata, hann er á föstudagskvöld. Þeir telja sig vera heppna sem hafa miða.

En er það víst?

Spár gera ráð fyrir hryssingslegu veðri. Hita við frostmark, slyddu og vindi – líkt og sjá má hér .

Þetta eru býsna erfið skilyrði til að spila fótbolta – það er ekki tilviljun að þessi íþrótt er leikin að sumarlagi á Íslandi.

Þeir sem sitja í stúkunni – hinir heppnu sem fengu miða – verða svo að passa sig að deyja ekki úr kulda.

Ætli menn hafi eitthvað pælt í að fresta leiknum?

Líklega er það ekki hægt. Leikdagar í heimeistarakeppni eru festir með löngum fyrirvara.

Það gæti kannski komið til greina að flytja leikinn eitthvað annað? Til Skotlands, Danmerkur, Noregs?

En þá yrðu auðvitað fáir íslenskir áhorfendur – nema efnt yrði til mikilla þjóðflutninga með öllum tiltækum samgöngutækjum?

Einhver mesti vetrarfótbolti sem hefur verið leikinn á stórmóti á Íslandi, úrslit bikarkeppninnar 1965. Þetta var á Melavellinum og mikið skrifað um hinar erfiðu aðstæður.