Líklega er ekkert hverfi í Reykjavík sem hefur orðið niðurrifsfýsn jafn illilega að bráð og gamla Skuggahverfið.

Ég vann í blikksmiðju á Lindargötu þegar ég var unglingur, þá var þarna lágreist timburhúsabyggð.

Henni hefur nánast allri verið rutt burt og byggð í staðinn forljót háhýsi. Ljótust eru reyndar þau sem voru byggð fyrst við Skúlagötuna, með háum burstum. Þau eldast líka skelfing illa. Ég fór einu sinni þar um með frægum myndlistarmanni frá Frakklandi – það blikuðu tár á hvörmum mannsins yfir ljótleikanum og eyðileggingunni.

Hérna sjáum við litlar myndir sem sýna hvernig Skúlagatan leit út áður. Í lífrænu borgarskipulagi hefði byggðin náttúrlega verið byggð í kringum þessi hús – en, nei, tíðarandinn þá var að rífa þau.

Hér getur að líta Kveldúlfsskála, stuttu áður en hann var rifinn 1983. Fjær má sjá sláturhús SS.

Þetta er hús trésmiðjunnar Völundar. Að því er veruleg eftirsjá. Myndirnar eru fengnar af Facebook-síðunni 101Reykjavik.