Margir hafa spurt hví Kína hafi svo mikinn áhuga á Íslandi.

Aðalástæðan er líklega sú að Ísland hefur fasta setu í Norðurheimskautsráðinu. Þar höfum við nokkur áhrif á stað þar sem Kínverjar vilja komast að. Sambandið milli Kína og Noregs hefur verið lélegt eftir að Norðmenn veittu andófsmanninum Liu Xiaobo friðarverðlaun Nóbels.

Það sýndi reyndar að vinátta við Kínverja ristir kannski ekki djúpt – snýst fremur um hagsmuni.

Önnur ástæðan er sú að Íslendingar eru veikluð þjóð sem hefur gengið í gegnum mikla efnahagskreppu, er óviss um stöðu sína í heiminum – og hefur forseta sem geysilega vinveittur Kínverjum, miklu fremur en þjóðum sem eru nær okkur.

Í haust var mér reyndar bent á að eitt mögulegt langtímamarkmið sem Kínverjar gætu haft á Íslandi. Þar gæti verið ein skýringin á áhuga þeirra á afskekktum jörðum til sveita.

Kínverjar hafa komið sér upp miklu geimprógrami og gervihnöttum þeirra fer stöðugt fjölgandi. Gervihnettirnir gegna bæði hernaðarlegum og friðsömum tilgangi – en Bandaríkjamenn eru mjög tortryggnir í garð þessa, eins og lesa má í þessari frétt.

Kínverjar þurfa stöðvar á jörðu til að fylgjast með gervihnöttum sínum. Þeir hafa stöðvar í Kína, Pakistan, Namibíu og Kenýa, en miklar deilur hafa verið um stöð sem þeir hafa fengið að nota í Ástralíu. Sagt er að Kínverjar hafi notað hana til að fylgjast með bandarískum herskipum.

Ég segi eins og er að þetta eru einungis getgátur. En Kínverjar ætla sér stóra hluti í geimnum. Það var fullorðinn bandarískur maður sem hefur starfað lengi við að fylgjast með gervihnöttum sem beti mér á að ein ástæðan fyrir áhuga Kínverja á Íslandi væri að koma upp slíkri stöð hérna í framtíðinni.