Boðað er til blaðamannafundar í dag þar sem segir að verði kynnt nýtt samkomulag um innanlandsflug.

Á fundinum verða fulltrúar ráðuneyta, Reykjavíkurborgar og Icelandair Group.

Líklega má búast við því að þarna heyrist í Jóni Gnarr borgarstjóra og Hönnu Birnu Kristjánsdóttur innanríkisráðherra, en hún fer með samgöngumál.

Nú er enn ekki vitað hvað felst í þessu samkomulagi, en innan stjórnmálanna er ríkur vilji til að aftengja flugvallarmálið áður en kemur að borgarstjórnarkosningum í vor.

Sumir hafa vonast til þess að flugvöllurinn verði aðalkosningamálið – þess gætir til dæmis í prófkjöri Sjálfstæðisflokksins en framboðsfrestur þar rennur út í dag – en ef fundið verður samkomulag sem gæti haldið í einhvern tíma verður þeim varla kápan úr því klæðinu.

Flugvallarmálið gengur þvert á flokkslínur og til dæmis er frambjóðendahópurinn hjá Sjálfstæðisflokknum áberandi klofinn gagnvart því. Vitað er að bæði Hanna Birna Kristjánsdóttir og Bjarni Benediktsson hafa haft hug á því að setja málið á ís fyrir kosningar – það er raunar spurning hvort þjóðin þolir öllu meiri umræðu um flugvöllinn og þá geðshræringu sem fylgir henni.

Það verður svo forvitnilegt að sjá hver verður afstaða borgarstjórnarinnar í Reykjavík. Hún er nokkuð samhuga um að vilja flugvöllinn burt, en hin fjölmenna undirskriftasöfnun sem fór fram undir heitinu Hjartað í Vatnsmýrinni hlýtur að hafa einhver áhrif á afstöðu hennar.