Í Kiljunni í kvöld förum við austur að Skógum undir Eyjafjöllum og hittum Þórð Tómasson safnvörð. Safn hans er eitt hið merkasta á landinu og þangað koma tugþúsundir gesta árlega. Þórður segir frá ýmsum munum í safninu sem tengjast nýrri bók sem hann er að senda frá sér, en að auki leikur hann fyrir okkur á hljóðfæri og fer með fornan kveðskap. Þórður er fæddur 1921 en er fjarskalega ern.

Bjarki Karlsson fékk um daginn verðlaun kennd við Tómas Guðmundsson fyrir ljóðabókina Árleysi alda. Bjarki er málfræðingur, sérfróður um bragarhætti, og sér þess staði í bókinni. Bjarki leikur sér með ýmsa bragarhætti og yrkir meðal annars upp vísuna frægu um afa sem fór á honum Rauð, hann gerir það í anda margra frægra skálda frá Agli Skallagrímssyni til Megasar.

Við fræðumst um Alice Munro, nýjan Nóbelsverðlaunahafa í bókmenntum – stórmerkan rithöfund.

Gagnrýnendur þáttarins fjalla um tvær nýútkomnar bækur: Glæpurinn, ástarsaga er eftir Árna Þórarinsson og Ástarsaga Íslendinga að fornu er eftir Gunnar Karlsson.

Bragi segir svo sögu af heitum en skammvinnum ástum.