Tónlistarmaðurinn David Byrne skrifar merkilega grein þar sem hann varar við að niðurhal tónlistar af internetinu geti komið tónlistarmönnum á kaldan klaka. Notendur tónlistar geta fengið sitt ódýrt og tekjur renna til netfyrirtækja en það eru þeir sem skapa sem bíða skarðan hlut.
Byrne segir að efnisveitur eins og Spotify og Pandora borgi smáaura fyrir að deila tónlist. Hann vitnar í grein sem nefnist „Lagið mitt var spilað milljón sinnum á Pandora og ég fékk 16,89, minna en ég fæ fyrir að selja skyrtubol.“
Hann nefnir einnig lag Daft Punk sem heitir Get Lucky og var langvinsælasti smellur sumarsins. Það var sótt meira en 100 milljón sinnum á Spotify, Byrne segir að meðlimir hljómsveitarinnar fái um 13 þúsund dollara hvor fyrir vikið. Þetta er fyrir plötu sem tók afar langan tíma að hljóðrita og var mjög dýr í vinnslu.
Annað sem er áhyggjusamlegt er einokunarstaðan. Amazon hefur algjört einræði á netbókamarkaði – það verður varla rúm nema fyrir eitt Spotify. Byrne segir að ef tónlistarmenn þurfi að reiða sig á tekjur af slíkri dreifingu, verði þeir upp til hópa gjaldþrota innan árs.
Það er sagt að spilanir á Spotify safnist upp eins og sandkorn, samkvæmt Byrne skilar það heldur litlu. Annað sem er talið þessum vef til tekna er að í gegnum hann uppgötvi menn nýja tónlist. En til þess eru auðvitað margar aðrar leiðir; hljómplötuverslanir sem nú heyra nánast sögunni til voru ágætur vettvangur þess.
