Í Kiljunni í kvöld fjöllum við um glæsilega bók með ljósmyndum eftir Sigfús Eymundsson. Sigfús var að mörgu leyti ótrúlegur maður, hann er frumkvöðull í ljósmyndun á Íslandi, hann lét fjölfalda myndir og seldi um allt land, hann stofnaði bókaverslun og hann var umboðsmaður Ameríkuferða.

Heillandi maður.

Við segjum frá stórvirki sem er heildarútgáfa á ljóðum Nóbelshöfundarins Tomas Tranströmer í þýðingu Njarðar P. Njarðvík. Tranströmer er magnað skáld sem hefur verið þýddur á ótal tungumál.

Við fjöllum um útgáfu Hins íslenska fornritafélags á fornritunum, en nú er út komin Hákonar saga í tveimur bindum. Bókaflokkurinn teygir sig aftur til 1933 en þá kom út Egils saga í útgáfu Sigurðar Nordal. Og því fer fjarri að sjái fyrir endann á útgáfunni. Það er merkilegt fyrir Íslendinga samtímans að vita að ráðist var í útgáfu fornritanna af miklum stórhug á tíma heimskreppunnar.

Við fáum að heyra hverjar eru uppáhaldsbækur Guðna Ágústssonar.

Gagnrýnendur þáttarins fjalla svo um þrjár bækur: Skessukatla eftir Þorstein frá Hamri, Söng Akkillesar eftir Madeline Miller og Mennina með bleika þríhyrninginn, en sú bók segir frá hörmulegum örlögum samkynhneigðra í útrýmingarbúðum nasista.

Útför Jóns Sigurðssonar og Ingbjargar Einarsdóttur í maí 1880. Ljósmyndin er eftir Sigfús Eymundsson. Við sjáum hersinguna ganga eftir Aðalstræti, aftast er Bryggjuhúsið þar sem nú er Café Reykjavík.