Vandinn við undirskriftasöfnun með flugvelli í Vatnsmýri er að hún byggir á áróðri og mjög lélegum upplýsingum.

Ekkert er leitast við að útskýra hvaða kostir kunni að vera í boði. Það er mikið látið með sjúkraflugsrökin – eins og ástand sjúkraflugs í landinu sé frábært.

Sem er alls ekki.

Sjúkraflugið hlýtur líka að þurfa að skoðast í ljósi ástands heilbrigðiskerfisins á Íslandi. Það er í mikilli og almennri kreppu.

Því miður boðar þetta ekki gott fyrir umræðu í landinu. Menn hrópa hver að öðrum yfir markalínur – sveitavargar gegn latteliðinu í Reykjavík. Flugvallarmálið virðist vera sérstaklega vel til þess fallið að ýfa geð þjóðarinnar.

Annað sem er áberandi við þessa undirskriftasöfnun er hversu hún tengist framboðsmálum í Sjálfstæðisflokknum í Reykjavík. Sagt er að einn forsvarsmaður söfnunarinnar hafi gert borgarpólitíkusum flokksins grein fyrir að þeir þyrftu ekki að kemba hærurnar ef þeir stæðu fast á því að flugvöllurinn færi – og að krafti Hádegismóa yrði beitt gegn þeim ef þeir sæju ekki að sér.

Sérstaklega virðist þetta eiga að bitna á Gísla Marteini Baldurssyni, þeim borgarfulltrúa flokksins sem hefur mesta þekkingu og áhuga á skipulagsmálum.