Daniel Cohn-Bendit, helsti leiðtogi stúdentauppreisnarinnar í Frakklandi 1968 er líka forystumaður Græningja bæði í Frakklandi og Þýskalandi.

Cohn-Bendit er í viðtali við Der Spiegel þar sem hann segist vera fylgjandi hernaðaríhlutun í Sýrlandi. Hann varar vinstri hreyfinguna við því að láta ódýrt Bandaríkjahatur stjórna gerðum sínum í kosningabaráttunni í Þýskalandi. Það þýði ekki að elta afstöðu Rússa. Annars hefði til dæmis íhlutunin í Kosovo verið óhugsandi.

Cohn-Bendit segir að Assad Sýrlandsforseti hafi farið yfir ákveðna línu með því að beita efnavopnum gegn þjóð sinni. Hann sé til í að gereyða þjóðinni bara til að halda völdum. Hann stundi þjóðernishreinsanir til að hrekja súnníta á brott.

Cohn-Bendit vill þó að hernaðaraðgerðir byggi á samstöðu Vesturlanda. Það væri afar slæmt ef Bandaríkin væru ein síns liðs. Það þurfi að stefna að vopnahléi í Sýrlandi undir eftirliti Sameinuðu þjóðanna. Þýskaland og önnur lönd í Evrópu ættu að taka þátt í hernaðaraðgerðunum, segir þessi gamli leiðtogi vinstri manna

Cohn-Bendit, „Rauði Danni“, varar vinstri hreyfinguna í Þýskalandi við ódýru Bandaríkjahatri.