Margt athyglisvert kom fram í viðtali Helga Seljan við Bjarna Benediktsson, fjármálaráðherra og formann Sjálfstæðisflokksins, í Vikulokunum á Rás eitt á laugardaginn.

Eitt af því sem þeir ræddu voru þjóðaratkvæðagreiðslur og synjunarvald forsetans. Þetta eru mál sem voru mikið rædd á síðasta kjörtímabili, í tengslum við Icesave og samningu nýrrar stjórnarskrár.

En það er vitað að Sjálfstæðismenn hafa alltaf verið lítt hrifnir af synjunarvaldinu og þjóðaratkvæðagreiðslur hafa ekki verið þeim að skapi, þótt kannski hafi hentað þeim að tala aðeins öðruvísi á síðasta kjörtímabili.

Í þættinum sagði Bjarni að ekki væri mikið lengur hægt að búa við núverandi ástand, þ.e. eilífar kröfur til forsetans um að senda hitt eða þetta málið í þjóðaratkvæðagreiðslu.

Bjarni sagðist vilja að gerðar yrðu breytingar á stjórnarskrá þannig að þar væri þröngt ákvæði um hvernig væri hægt að krefjast þjóðaratkvæðagreiðslu.

Helgi spurði hvort slíkt ákvæði myndi taka yfir 26. grein stjórnarskrárinnar þar sem er kveðið á um synjunarvald forsetans.

Bjarni svaraði að hann sæi fyrir sér að slíkt ákvæði hefði í för með sér að forseti myndi ekki blanda sér í mál.

„Það ákvæði yrði annað hvort óvirkt eða fellt út,“ sagði Bjarni í viðtalinu.

Vart er hægt að skilja þetta öðruvísi en að formaður Sjálfstæðisflokksins vilji afnema málskotsrétt forsetans. Heldur er ólíklegt að vinir forsetans í Framsóknarflokknum vilji fara í slíkan leiðangur með honum, að minnsta kosti ekki meðan Ólafur Ragnar Grímsson situr á forsetastóli.