Í gegnum árin hef ég skrifað fjölda pistla um netfíkn og hvað tölvur og tölvuleikir geta reynst mikill háski, aðallega fyrir drengi og unglingspilta.

Oftast hefur mér verið svarað með skömmum, það er furðuleg hversu margir virðast líta á umfjöllun um þetta sem árás á sig. Það er sagt að börn geti lært margt af tölvuleikum – jú, kannski er það hægt, en sú færni er í besta falli takmörkuð.

Drengir sem ánetjast tölvum hverfa inn í einhvers konar óraunveruleika. Stundum minna áhrifin það sem gerist við langvarandi hassreykingar. Þeir verða sljóir og sinnulausir – þeim fer að ganga illa í skóla og eiga á hættu á að flosna upp úr námi. Eðlilegur metnaður gufar upp. Það eru bein tengsl milli tölvuleikja og lélegs námsárangurs pilta og fjölda þeirra sem hætta í skóla.

Í frétt Rúv er sagt frá netsjúkum ungmennum sem þurfa að leita á náðir barna- og unglingageðdeildar.